單純‧快樂

好怕懷舊，但今日例外。

知道將會响公開塲合遇到馬仔（舊讀者係咁稱呼馬榮成）所以摷咗兩本佢嘅天下畫集到塲俾佢簽名留念。其實我已經好耐冇追看港漫，只係每逢新書出版叫做捧下塲買本睇下，但港漫往往都叫人失望。今日見到馬Sir（現在普遍係咁稱呼佢）我好想同佢合照，因為佢曾經係我成長階段投射嘅偶像，年少時身邊亦有唔少愛好漫畫嘅同學仔跟我一樣。

馬榮成佢影響咗當年好多年輕人喜愛繪畫。我其實好想趁今日嘅合照，跟年少嘅自己作一個隔空交流。呢張陳年舊照片係喺我離開校園之前，跟一大班同學老師宿營時影低，我仲記得嗰日咁啱天下畫集第三期出版，有個遲入營嘅同學幫手去報攤各人買一本，然後帶入嚟俾我哋睇，果日過得好開心好快樂，年青嘅時候開心快樂就係咁單純。

宿營其中一個晚上嘅營火會，大家好老套咁圍埋一切臨別秋波講心事，對於將來內心其實浮躁，尤其成長中遇上＂六四＂後，各人有一陣陣青澀味，而我就好想進入漫畫行。當入行以後，見識過香港漫畫工業嘅運作，已經唔再抱有期望，決定離開，頭也不回走咗去動畫嘅世界。每次諗番起，我都覺得呢次係人生中做得最啱嘅決定。

但要承認香港漫畫的確曾經為普羅大眾帶嚟過唔少歡樂回憶！亦係我少年時逃避現實嘅安全避難所！對於果份情懷個人感受依然濃郁，依然喜愛當日馬仔嘅天下畫集！懷舊就一晚咁多啦！