自己從事動畫工作已持續十幾年，成日都好希望可以做到人生最後一刻，咁就好喇。
通常有個人"希望乜乜物物"嘅時候，即係話佢唔抱樂觀嘅態度。的而且確响香港做創作係冇乜優勢，同好多朋友討論過，呢點係冇爭議性。但個人相信創意無限，劣勢冇話永恆，視乎多少人願意付出。
自己從來冇入讀過任何動畫學院，因為當時香港冇所謂嘅動畫學校可以選擇進修，所以學動畫呀漫畫呀對我嚟講，其實可以唔使返學上堂。至於本地嘅動畫課程，唉…個人意見係唔願意俾自己下一代受罪。讀完係有張沙紙，又如何？見工都係睇你修養同創意，唔係睇你識用幾多軟件。
日前又一間動畫公司T-Film裁員，同時多間院校亦如火如荼攪梗畢業展，兩邊都有曾經教過嘅學生，有公司急於炒人；有人急於搵工，霎時間人浮於事。我唔識打完塲講"唔好灰心慢慢嚟啦"之類無模稜兩可，因為冇意義，個現實係殘酷係要你面對，咪學習面對囉。但"灰心"可以係週期性，捱過咗又一條好漢。如果仲想做動畫嘅，可以襯有時間問問自己「當初乜嘢令你有做動畫嘅衝動？唔做會唔會後悔呢？」
Bless you, my friends
單身好漢
2012-06-30
