麵包超人

 

作為成年男士，我都鐘意睇"麵包超人"卡通，仲keep住好幾隻舊ｖｃｄ。

 

論創意同技巧，目前好多動畫已經做唔番呢個基本水平。

往日未有軟件幫助嘅動畫年代，好多嘢都係用手一筆一筆畫出嚟，畫面構圖睇得出動畫師嘅耐性同心機，舊卡通對比起新動畫有味道好多。

押井守‧機動警察

「世界有好多人打住"正義"嘅旗號發動戰爭，製造不公義嘅和平，魚目混珠粉飾太平。」

訊息嚟自日本動畫「機動警察2」(押井守1993)，連同前作「機動警察1」（1989）今晚細心重溫。（仲記得當年老翻碟嘅翻譯，真係睇到一頭霧水！）

押井守本人善於運用有限資金人手；強項係衡量劇情訊息，然後為畫面需求作出調配；再用自己嘅電影語言去完成作品。兩集「機動警察」用咗唔少＂四兩撥千斤＂嘅處理手法可供動畫人借鏡（超級實用！）。

至於押井守動畫好睇嘅原因，個人認為手法夠寫實，內容有意識地不繼反映現實嘅不足，不停向未來世界質疑，氣氛帶消極，但思想冷靜樂觀。相信同佢出生於剛剛二戰後(1951)，成長於日本社運熾熱年代有密切關係。