維他奶保溫櫃

 

7仔見未有熱麥精，人心急所以抱咗呢個＂維他奶保溫櫃＂返屋企。

講笑，真相其實係：剛剛見佢擺放喺廢鐵回收檔門外，正在排隊等候上貨櫃車往堆填區，接受不人道毀滅，個畫面好慘好淒涼，餘下嘅生命只剩低唔夠24小時。

然後我就好似《胭脂扣》裡面張國榮飾演嘅十二少咁，向個樣貎兇狠、古惑仔模樣嘅老闆問價，佢見我好人好姐求愛心切，當堂變身夜總會＂媽咪＂咁吊高嚟賣。其實我食下午茶路過咋阿浩南哥，邊會隨身帶住＂巨款＂濕平呀。

 

你求財啫，俾條生路人哋(保溫櫃）行下好喎(我心諗)，今日留一線他日好相見喎(都係心諗)，最後開價還價幾次就贖咗佢番屋企。

暫時觀察成個發熱保溫器表面冇乜損壞，如發熱底板性能仲良好，真係可以好似7仔咁買下熱飲。

如果第日有機會擁有個人工作室，一定要放喺當眼處，到時候應該會有幾個動畫伙伴，大家無聊或冇靈感，唔使驚，隨手就嗱起幾支熱麥精出嚟飲，你一言我一語噴下口水，補充體力腦力，然後又幹勁十足繼續完成未完嘅動畫工作。